رسالة الموقع
مبادرة مهارات من جوجل و المسارات التعليمية المتاحة

مبادرة مهارات من جوجل و المسارات التعليمية المتاحة

في أواخر عام 2018 اعلنت 15 شركة عالمية على رأسهم جوجل و آبل إنهم هيلغوا شرط الشهادة الجامعية للمتقدم لوظيفة عندهم يعني طالما إن الشخص دارس المجال ( مع نفسه self-study ) أو عنده سنين خبرة كافية فيه يقدر يتقدم للوظيفة بغض النظر عن حصوله على شهادة جامعية في المجال ده.
و جوجل عشان تساعد في تحقيق ده و تسد العجز في عدد اﻷشخاص المؤهلين علميا أطلقت المبادرة Grow_With_Google بمحتوى تعليمي إنجليزي , و اطلقت نسخة من نفس المبادرة بالعربي بعنوان مهارات_من_جوجل بتهدف من خلالها إنها تعلم الناس مجالات تضمن لهم فرص عمل مجزية , و في نفس الوقت توفر لجوجل نفسها مرشحين للوظائف المتاحة لديها على مستوى عالى من الكفاءة ☑.

بالتزامن مع كده أطلقوا مسارات تعليمية تحت اسم "شهادات جوجل المهنية - #Google_Career_Certificates"، ودي بتقدم أساسيات مجالات كتيرة للناس يذاكروها ويقدروا بعدها يشتغلوا أول شغل كـ entry-level job وبعد كده يكتسبوا خبرة ويترقوا وخلافه.

المسار من دول بيكون متكون من حوالي 7 كورسات مثلًا ، و جوجل بتقول إن المسار الواحد تقدر تخلّصه في 6 شهور بمعدل مذاكرة 10 ساعات فقط أسبوعيا 💪.

المسارات المتاحة حاليا هي :

1- مسار دراسة تحليل البيانات Data Analytics

2- مسار تعلم إدارة المشاريع Project Management

3- مسار تصميم تجربة المستخدم UX Design

4- مسار الدعم التقني IT Support

5- مسار برمجة تطبيقات اﻷندرويد Android Development


جوجل بتخطط إنها بالمسارات دي تحل كذا مشكلة:

- إنها تقلل من نسبة البطالة في أمريكا بشكل أساسي , و في العالم كله عموما.
- إنها تساعد الناس اللي مش قادرة تدخل جامعة إنها تذاكر نفس محتوى الجامعات و تشتغل.
- تسد الفجوة بين الدراسة والخبرة العملية , فالمسارات دي بيبقى فيها مشاريع بيشتغل عليها الطالب ولما بيخلص المسار بيبقى أنجز كذا مشروع - غالبا بيكونوا من 1 لـ 3 - يقدر يذكرهم في البورتفوليو / السي في بتاعه.


المهم، جوجل بتقدم المسارات دي على موقع كورسيرا ، تكلفة الاشتراك فيها 49 دولار شهريا يعني أقل من 300 دولار للست شهور 😫 ، و قبل ما تتصدم متقلقش كورسيرا بتوفر إمكانية التقديم على طلب الدعم المادي "Financial aid" لدراسة الكورسات دي يعني تقدر بكل سهولة تدرسها بشكل مجاني تمامًا 😄.

بص أنت هتدخل على اللينك ده اللي بينقلك على موقع جوجل :

تمام ؟ هتلاقي الـ 5 مسارات موجودين قدامك ، اختار المسار اللي أنت عاوزه وهتلاقي جنبها Get Started دي هتنقلك على لينك الكورس على موقع كورسيرا ، عظيم كده ؟

هتدخل ع الكورس وهتلاقي مكتوبلك Financial Aid Available هتروح دايس عليها وهيجيبلك طلب للحصول ع المساعدة المالية ، هتملى البيانات كلها و تقدم الطلب , هيقولك بعدها إن الطلب بتاعك إتبعت و هيتم الرد عليك بعد 15 يوم .

طبعًا مش هتستنى الـ 15 يوم عشان تبدأ ف الكورس ، هقولك هتعمل إيه ، جوا كل تخصص من دول هتلاي مجموعة من الكورسات ، ف أنت بعد ما تختار التخصص اللي نويت عليه هتدخل تختار أول كورس فيه بعدها هتلاقي كلمة Enroll for free (دي تجربة مجانية وبعدها هياخد منك فلوس ، ف ركز معايا بس واعمل اللي بقولك عليه) هتدوس عليها ، وهتنزل تحت خالص هتلاقي Audit the course دوس عليها ، وكده هتقدر تتابع الكورس عادي جدًا بس مش هيبقى ليك شهادة ، لغاية بس ما الطلب بتاع المساعدة المالية اللي أنت قدمته فوق يتقبل وكده تقدر تاخد الكورس ببلاش والشهادة كمان 😀
مشاركات ذات صلة
إضافة تعليق..