رسالة الموقع
فتكات من زمن فااااااات

فتكات من زمن فااااااات

منتدى فتكات اللي كان ملىء السمع و البصر و اللي فضل متصدر نتائج البحث ﻷي معلومة تهم المرأة العربية ﻷكتر من 12 سنة فجأة أعلن القائمون عليه إغلاقه .. يا ترى ليه ؟
أولا خلينا نرجع خطوتين تلاتة لورا و نشوف القصة من البداية 😪
فتكات أسسه من 12 سنة تقريبا الباشمهندس محمد حسام خضر ( انترنت بلس ) و بعد 7 سنوات من تشغيله باعه لشركة ( مجموعة أبو نواف ) , و بعدها الشركة باعته مع مجموعة مواقع كبيرة لموقع مكتوب التابع حاليا لشركة ياهووو

منتدى فتكات كان فعليا أشهر و أكبر منتدى عربي متخصص للمرأة , لكن ده ما يمنعش إن كان ليه منافسين كتير و أغلبهم كان قايم على تقليد فتكات نفسه سواء في اﻷقسام أو حتى الاسم , زي منتدى .. محدش يضحك .. عدلات 😝😝

المنتديات التانية اللي كانت بتنافس فتكات أو بتشاركها في الوجود على الانترنت فضلت تختفي منتدى ورا منتدى , و ده مش زي ما جه في بالك ﻹنهم تقليد و اﻷصل هو اللي هيكمل .. ﻷ أبسولوتلي 😕

المنتديات العربية بصفة عامة فضلت تختفي منتدى ورا منتدى , و يمكن حرفيا فتكات ده كان آخر منتدى عربي يختفي و أكتر منتدى فضل مكمّل , الناس القديمة على النت أكيد هتفتكر منتديات ديفيدي فور آراب , و منتديات سوالف سوفت , و قهوة كتكوت و ترايدنت و غيرهم كتيييييييييييير كان عدد زوارهم يوميا ضخم جدا جدا جدا

و مع ذلك ما قدروش يكملوا و يستمروا , و آخر قلعة وقعت من يومين هي " فتكات ".

أيه سبب إغلاق فتكات ؟

الأسباب العامة اللي أنهت خدمة المنتديات العربية , و بقول العربية تحديدا ﻹن بعض المنتديات اﻷجنبية قادرة تحافظ على وجودها لغاية النهارده و هقول ليه في آخر البوست , نرجع للسبب الرئيسي في إغلاق المنتديات العربية = الفيسبوك و شبكات التواصل اﻹجتماعي بصفة عامة.


المستخدم زوقه اتغير , و الطريقة اللي بيفضّل يتواصل بيها مع اﻵخرين اتغيّرت بشكل جذري بسبب ظهور مواقع التواصل اﻹجتماعي و مرونتها في تغطية كل المجالات تقريبا , يعني موقع الفيسبوك هتلاقي عليه صفحات متخصصة في الطبيخ 🍔 و صفحات متخصصة في أخبار الطاقة الذرية ‼
في نفس الموقع يا مؤمن
فتكات من زمن فااااااات

المنتديات العربية عجزت عن أمرين مهمين جدا في مواجهة التحدي ده :

1- التكيف مع الوضع الجديد و تطوير بنيتها و أفكار القائمين عليها اللي كتير منها بيرجع لعصور ما قبل اكتشاف النار 🔥🔥 , زي مثلا إنك لما تسجل في منتدى ما تقدرش تكتب موضوع قبل ما يعدي على تسجيلك 20 يوم و تكتب على اﻷقل 30 كومنت و ترفع صورة وصل نور أمور فات عليه 6 شهور 😆
و كإنك هتاخد جايزة لما يسمحوا لك تكتب موضوع في منتداهم الموقر , على العكس بتلاقي حرية و رحابة في مواقع التواصل اﻹجتماعي لدرجة إنك بمجرد ما تدخل الفيسبوك تلاقيه بيقولك " بما تفكر ؟ فضفض و ارغي و اهبد براحتك 😁 "

2- تاني حاجة عجزت عنها المواقع و المنتديات العربية هي التعاون , و ده تقريبا أمر عجز عنه العرب كلهم فيما بينهم 😥 , يعني المنتديات العربية اللي حرفيا كانت بتضم مئات اﻵلاف من اﻷعضاء و بتغطي مجالات متنوعة جدا , كان ممكن بإندماجهم و تطويرهم تخرج لنا شبكات تواصل ( أو حتى منتديات يا سيدي ) ليها فرصة أكبر في النمو و الانتشار و جذب المستثمرين لتمويلها.


لو هنرجع لفتكات تحديدا , فحتى اﻵن سبب اﻹغلاق الحقيقي ما حدش اتكلم عنه أو وضحه , و إن كنت متأكد إنه مش هيخرج عن اﻷمرين اللي فوق دول , باﻹضافة إلى إن برمجية الموقع كانت محتاجة تعديلات ضخمة جدا , ممكن توصل لدرجة إعادة البناء , و مع ضخامة حجم قاعدة البيانات فالموضوع كان هيبقى مكلف و مرهق جدا جدا.

و محدش يفهمني غلط , برمجية الموقع فعلا كانت متميزة جدا جدا , سعادتك دي إنتاج محمد حسام خضر 💪💪 يعني علم من أعلام الانترنت العربي , لكن الموقع قعد فترة طويلة بدون تطوير جذري يستغل التقنيات الحديثة للويب , خصوصا اللي طلعت لنا مع انتشار الموبايلات الذكية Smart Phones.

الباشمهندس محمد حسام , مؤسس فتكات , كتبت على صفحته على الفيسبوك إنه تواصل مع الشركة المالكة لفتكات و قدّم لهم اقتراح ممكن يرجّع فتكات للعمل مرة تانية , لكن ما وضحلناش الاقتراح ده ايه , و لسه ما ردّوش عليه و إن كنت اعتقد - من غير ما اعرف الاقتراح - إنه مش هيتنفذ ﻹن قرار إغلاق موقع بالحجم ده و بالشكل ده واضح إنه جه بعد فترة يأس طويلة و دراسة لسبل الخروج من اﻷزمة و محاولة الاستمرار .. لكن دي سنّة الحياة.
مشاركات ذات صلة
إضافة تعليق..